ചിരിക്കാനറിയാതെ ....വിതുമ്പനറിയാതെ ....
എന്റെ നൊമ്പരമത്രയും കാറ്റുകൊണ്ട്പോവാതെ
നേര്‍ത്തു നേര്‍ത്തു പെയ്യുകയാണ് ഞാന്‍ .........

Tuesday, 25 November 2014

ഇരുട്ടില്‍ നിന്നും വര്‍ണ്ണങ്ങളിലേക്കുള്ള
ഒരു പുലര്‍കാല സ്വപ്നത്തിലാണ്
നാം പരസ്പരം കണ്ടുമുട്ടിയത് ...
ഇനി ഒരു പകലിലേക്കുള്ള ദൂരത്തില്‍
നീയെന്നെ ഉണര്‍ത്തരുത് ...

Saturday, 12 July 2014

യുദ്ധം

മൂകമായ തെരുവുകളില്‍
മഴയിലൊലിച്ചു രക്തപുഷ്പങ്ങള്‍ .
ഉറ്റവര്‍ക്കുള്ള തിരച്ചിലില്‍
കെട്ടുപോയ പ്രതീക്ഷകള്‍.
കൈവിട്ടുപോയ കുഞ്ഞിനെ തേടി
മുറിവേറ്റൊരു പക്ഷി.
ജീവനറ്റ ശരീരങ്ങള്‍ക്കുമേല്‍
മണം പിടിച്ചൊരു നായ.
ഒരുപക്ഷെ
അത് യജമാനനെ തേടുകയാവാം.
ചിതറിവീണ കുഞ്ഞിളം കൈകള്‍
എന്തോ തിരഞ്ഞുകൊണ്ടിരുന്നു.
ഉണങ്ങിയ ചില്ലകളില്‍
കാറ്റിന് പിടികൊടുക്കാതെ
അവസാന ജീവനും വീണുതിര്‍ന്നു.
നനഞ്ഞ മണ്ണിന് രക്തഗന്ധം. 

Friday, 11 April 2014

പട്ടം

കാറ്റും 
മഴക്കോളുകള്‍ക്കും ഇടയില്‍ 
നൂല് പൊട്ടിയലഞ്ഞു.
ചുരങ്ങള്‍  കയറിയിറങ്ങി 
കൂര്‍ത്ത മുള്‍പടര്‍പ്പിലും 
ഉണങ്ങിയ കൊമ്പുകളിലും 
തട്ടി തട്ടി ഒഴുകി വീഴുന്നു.
ദിക്കറിയാതെ
വഴി തെറ്റി അലയുമ്പോള്‍ 
എത്തിപ്പിടിക്കാനാവാതെ
പാദങ്ങളില്‍ 
കുത്തിചൂഴുന്ന വേദന.
പടര്‍പ്പുകള്‍ക്കിടയില്‍  നിന്ന്
ഒടുവില്‍  കണ്ടുകിട്ടുമ്പോള്‍
എല്ല് നുറുങ്ങി
തൊലി പൊളിഞ്ഞ്
നീ നീയല്ലതായിതീര്‍നിരുന്നു ..

Tuesday, 31 December 2013



വരൂ...
 മാറ്റത്തിന്റെ വസന്തങ്ങൾക്കായ്‌
ഇനി നമുക്ക് വിത്ത് പാകാം ...
കൊഴിഞ്ഞു വീണ ഓരോ ഇതളുകളിലും
വരാനിരിക്കുന്ന പോരാട്ടത്തിന്റെ
നാൾവഴികൾ കുറിയ്ക്കാം ...
ഇന്ന് ഈ ഡിസംബർ ന്റെ
അവസാന രാത്രിയും മറയുമ്പോൾ
 കുളിരുള്ള സ്വപ്നങ്ങൾ
ഇനി ജനുവരിയ്ക്ക് സ്വന്തം...
പുതിയ പ്രതീക്ഷകളുമായ്
വീണ്ടുമൊരു പുതുവർഷം ....
അടിപതറാതെ മനമിടറാതെ
നമുക്ക് വരവേൽക്കാം ....


               ആശംസകളോടെ
               രേഷ്മ പെരുനെല്ലി

Wednesday, 9 October 2013








കടംകൊണ്ട വാക്കുകളിൽ
ഞാനഭയം തേടുമ്പോൾ
നീയെനിക്കായ്
ആശ്വാസവാക്കുകൾ പൊഴിക്കരുത്.
തിരിച്ചു നല്കാൻ
ഇനിയെന്നിൽ ഒന്നും അവശേഷിക്കുന്നില്ല .
തിരിഞ്ഞു നടക്കാൻ
ഇനിയെനിക്ക് പാതകളില്ല .
ഓര്മകളുടെ തണലിൽ
ഞാനിനിയൊരു കൂടോരുക്കട്ടെ.
അന്ന്,
എന്നെ തളര്തുന്ന നിന്റെ മൊഴികൾ
നീയെന്നില്നിന്നും തിരിച്ചെടുക്കുക..
കടലെടുത്ത സ്വപനങ്ങൾ
കൂട്ടിവെച്ചിനി
വരുംജന്മം നമുക്ക് തീര്ക്കാം .
സ്വപനങ്ങളുടെ വാതിലുകൾ
ഞാൻ താഴിട്ടു പൂട്ടുന്നു..
ഞാനറിയാത്ത എന്റെ വഴികളിൽ
ഇനി മരണമെന്ന സത്യം.
നീയെനിക്കു മാപ്പ് തരിക.....

Saturday, 31 August 2013

നീ നിശബ്ദയായിരുന്നു






 നിശബ്ദതയുടെ ചരട്
നീ പൊട്ടിച്ചെറിഞ്ഞപ്പോഴും 
വാക്കുകൾ ഇടറി 
നീ താഴെ വീണപ്പോഴും 
അവൻ നിനക്ക് 
ആരെല്ലാമോ ആയിരുന്നു .
ഒരിക്കൽ 
ഓർമ നശിച്ച അവൻ 
ഓർത്തെടുത്തത്‌ 
നിൻറെ പേര് മാത്രം.
പക്ഷെ ,നീ അവനെ മറന്നു.
നിനക്കവൻ ആരുമല്ലായിരുന്നു .
നീ  നിശബ്ദയായിരുന്നു .

Monday, 10 June 2013

പുനര്ജന്മം





                                                       നീയറിഞ്ഞുവോ
                                                       ഇന്നെന്റെ മന്ദാരങ്ങളിൽ
                                                       നിനക്കായ്‌ വിടർന്ന  പൂവിനെ ...
                                                       ഗുൽമോഹർ പൂത്ത വഴികളിൽ
                                                       നിനക്കായ്‌ കാത്തിരുന്ന ദിനങ്ങളെ ...
                                                       വസന്തത്തിന്റെ ,
                                                       തളിർത്ത  ചില്ലകളിൽ
                                                       നിനക്കായ്‌ ഒരുക്കിയ നിറഭേദങ്ങൾ ...
                                                       നീ ചുംബിച്ചുലച്ച എന്റെ ചുണ്ടുകൾ ...
                                                       ജന്മാന്തരങ്ങളിൽ
                                                       നീ പൂവായും
                                                       ഞാൻ വണ്ടായും
                                                       ഇനി ജനിക്കാം ...
                                                       ഋതുഭേദങ്ങളിൽ
                                                       നമുക്ക് കയ്മാറാം
                                                       ബാക്കിയാക്കിയ
                                                       ഒരുപിടി സ്വപ്‌നങ്ങൾ ...

Saturday, 6 April 2013

ജനറേഷൻഗ്യാപ്‌


                               
                           
                                                          പണ്ട് ,വക്ക് പൊട്ടിയ സ്ലേറ്റിൽ
                                                          മറന്നുവച്ച പുസ്തകത്താളിൽ
                                                          അടരാൻ വയ്യാത്ത വിധം
                                                          നീ കുറിച്ചിട്ട വാക്കുകൽ
                                                          ഇന്ന് ,ലാപ്ടോപ്ന്റെ 
                                                          തെളിഞ്ഞ സ്ക്രീനിൽ
                                                          പരസ്പരം പഴിച്ച്
                                                          ചോദ്യംചെയ്തൊടുവിൽ
                                                          ഡിലീറ്റ് ബോക്സിലേക്ക് ....

Tuesday, 5 March 2013

പുകയുന്ന ചോദ്യം

                                 


                                                              
                                                                 വിറളി പൂണ്ടവന്റെ
                                                            കാമ ഭ്രാന്തുകള്‍ക്കെതിരെ
                                                                  ഒച്ചയെടുത്തവള്‍
                                                        പിറ്റേന്ന് ,വാര്‍ത്തകളില്‍ താരം.
                                                                വോട്ടെടുപ്പ് തുടങ്ങി.
                                                             അഭിപ്രായ കോളത്തില്‍
                                                               അവര്‍ രേഖപ്പെടുത്തി
                                                      "പെണ്ണ് പുറത്തിറങ്ങേണ്ടത്തവള്‍".
                                                          "ന:സ്ത്രീ സ്വാതന്ത്ര്യമര്ഹതി".
                                                             മറ്റു ചിലര്‍ രേഖപ്പെടുത്തി.
                                                            "അവള്‍ ഒരു അഹംകാരി".
                                                               കൂട്ടത്തില്‍ ഒറ്റപെട്ട്
                                                                പുകഞ്ഞു പുകഞ്ഞു
                                                                    ഒരു ചോദ്യം..
                                                              "വിലങ്ങ് വയ്ക്കേണ്ടത്
                                                            സ്ത്രീ സ്വാതന്ത്ര്യത്തെയോ
                                                                       അതോ,
                                                                കഴുക കണ്ണുകളിലെ
                                                               കാമ ഭ്രാന്തിനെയോ ?".
                                                            തുരുമ്പെടുത്ത തത്വങ്ങള്‍
                                                                 വിളമ്പിയവരുടെ
                                                                നാവിനോരുത്തരം-
                                                       നല്കാനവാത്തത്‌ കൊണ്ടാവണം,
                                                                ഉത്തരങ്ങളില്ലാതെ
                                                            വീര്‍പ്പുമുട്ടി പൊറുതിമുട്ടി 
                                                              അത്തരം ചോദ്യങ്ങള്‍
                                                   വീണ്ടും വീണ്ടും പൊട്ടിത്തെറിക്കുന്നത് ....
   




      

Sunday, 10 February 2013

സുര്യനെല്ലിയും ജസ്റ്റിസ്‌ ബസന്തും ..!!


                                            

                                               

                                                     പത്ര മാധ്യമങ്ങളും ടി.വി ചാനെലുകളും തുറന്നാല്‍ കാണുന്നത് സ്ത്രീപീഡനങ്ങള്‍ മാത്രം..പത്രങ്ങളില്‍ സുര്യനെല്ലി നിറഞ്ഞാടുമ്പോള്‍ ഇരയാക്കപ്പെട്ട പെണ്‍കുട്ടിയുടെ വേദനയിലേക്ക് ഒന്ന് തിരിഞ്ഞു നോക്കാന്‍ പോലും മനസ്സ് കാട്ടാതെ ഇരയെ വീണ്ടും വീണ്ടും ഇരയാക്കപെടുന്നു എന്ന സത്യമാണ് നമുക്ക് കാണാനാവുന്നത് .കേസിലെ 35 പ്രതികളെയും വെറുതെ വിട്ട് ഹൈക്കോടതിയില്‍ വിധി പറഞ്ഞ ജസ്റ്റിസ്‌ ബസന്തിന്റെ വഴിപിഴച്ച പരാമര്‍ശങ്ങള്‍ ഏതൊരു പെണ്ണിനും സഹിക്കാവുന്നതിലും അപ്പുറമാണ് ..16 വര്‍ഷമായ്  നീതിക്കുവേണ്ടി പോരാടുന്ന ഒരു പെണ്‍കുട്ടിക്ക് നേരെയുള്ള നീചമായ പ്രവൃത്തിയെന്നു പറയാതെ വയ്യ..
     പെണ്കുട്ടിയുടെത് ബാല വേശ്യവൃത്തിയെന്നും ,ബാലവേശ്യവൃത്തി ബലാല്‍സംഗമല്ലെന്നും പറയുന്ന ബസന്ത് മറ്റൊരു കാര്യം കൂടി ചൂണ്ടികാട്ടുകയുണ്ടായ് .."പെണ്‍കുട്ടി പക്വത എത്താത്തവളെന്നു" ഉം ..അങ്ങനെയെങ്കില്‍ ബസന്തിന്റെ പരാമര്‍ശം തീര്‍ത്തും വിവരമില്ലായ്മ എന്നാണ് പറയേണ്ടത്..കാരണം,പക്വത എത്താത്ത ഒരു പെണ്‍കുട്ടിയെ വഴി നീളെ കൊണ്ട് നടന്നു പീഡിപ്പിച്ചത് എങ്ങനെയാണു അപ്പോള്‍ ബാലവേശ്യവൃത്തിആകുന്നത്‌..? യഥാര്‍ത്ഥ കുറ്റവാളികളെ രക്ഷപെടുത്താന്‍ ,16 വര്‍ഷത്തെ യാതനകള്‍ അനുഭവിച്ച ,നീതിക്ക് വേണ്ടി ഇന്നും തന്റെ മൊഴികളില്‍ ഉറച്ചുനിന്നു പോരാടുന്ന ഒരു പെണ്‍കുട്ടിയെ വഴിപിഴച്ചവള്‍ ആയി ചിത്രീകരിക്കാന്‍ ആണ് ബസന്തിനെ പോലുള്ളവര്‍ ഇത്തരം പരമര്‍ശങ്ങളിലൂടെ ശ്രമിക്കുനതെന്ന് വ്യക്തം..
 ഹൈക്കോടതി വിധിയില്‍ ഞെട്ടല്‍ രേഖപെടുത്തിയ സുപ്രീം കോടതിയെ പോലും പരിഹസിച്ചായിരുന്നു ബസന്തിന്റെ വാക്കുകള്‍....
     
                 
                               കാര്യങ്ങള്‍ ഇത്രയൊക്കെയായിട്ടും ഇതിനെതിരെ പ്രതികരിക്കുന്ന സമുഹത്തിന് നേരെയും ഒരു കൂട്ടം ആളുകള്‍ അസഭ്യങ്ങളും ,വിവരമില്ലാത്ത ചോദ്യങ്ങളുമായ് മുന്നോട്ട് വരുന്നതായ് കാണുകയുണ്ടായ് ..
"40 ഓളം പേര്‍ പീഡിപ്പിച്ചിട്ടും എന്തുകൊണ്ട് അവള്‍ ഒന്ന് എതിര്‍ത്തില്ല.,ഇറങ്ങി ഓടിയില്ല.,,"..
ഇത്തരം വിവരമില്ലാത്ത  ചോദ്യങ്ങള്‍ ചോദിക്കുന്ന സഹോദരന്മാര്‍ ഒന്ന് മനസ്സിലാക്കണം ,ഒരിക്കല്‍ പീഡിപ്പിക്കപെട്ട ഒരു പെണ്‍കുട്ടിയുടെ മാനസികാവസ്ഥ പെണ്ണായ്  പിറന്നവര്ക്കെ  അറിയൂ...അവള്‍ക്കു നേരെ ഇത്തരം ചോദ്യശരങ്ങള്‍ എറിയുന്നതിന് മുന്‍പ് അതൊന്നു മനസിലാക്കിയാല്‍ നന്നായിരിക്കും നിങ്ങള്‍....


                  ഇനി മറ്റു ചില "സദാചാരവാഹകര്‍ " എന്ന് സ്വയം വിശേഷിപ്പിക്കുന്നവരുടെ കണ്ടെത്തലുകള്‍ ഇങ്ങനെ...,അസമയങ്ങളില്‍ സ്ത്രീകള്‍ പുറത്തിറങ്ങുന്നതും,അവളുടെ വസ്ത്രധാരണ രീതിയും ആണ് പുരുഷനെ പ്രലോഭിപ്പിക്കുന്നത് എന്നും ,അതുകൊണ്ട് സ്ത്രീകള്‍ ക്ക്  സ്വതന്ത്രമായ്  പുറത്തിറങ്ങി നടക്കാനുള്ള അവകാശമില്ല എന്നാണ്  അവരുടെ കണ്ടെത്തല്‍..പല സോഷ്യല്‍ മീഡിയ സൈറ്റ് കളിലും ആളുകളുടെ ഇത്തരം പ്രതികരണങ്ങള്‍ കാണുമ്പോള്‍ ലജ്ജ തോന്നിപോവുകയാണ്....ഒന്ന് പറഞ്ഞോട്ടെ ,,സ്ത്രീകളുടെ ശരീരത്തിനെ മാത്രം ,അവളെ ഒരു ഉപഭോഗ വസ്തുവായി മാത്രം കാണുന്ന വൃത്തികെട്ടവന്മാര്‍ ആണ് എന്ന് നിങ്ങള്‍ തന്നെ സമ്മതിച്ചു തരുകയാണ്‌ ഈ പരാമര്‍ശത്തിലൂടെ  എന്നതാണ് സത്യം...നിങ്ങള്‍ ഓരോരുത്തരും കാമവെറി പൂണ്ടു നടക്കുന്നവര്‍ ആണെന്നും ,അതുകൊണ്ട് നിങ്ങളുടെ മുന്നിലെത്തുന്ന ഏതൊരു സ്ത്രീയേയും പിച്ചിചീന്തും എന്നും,അതുകൊണ്ട്  "സ്ത്രീകളെ  നിങ്ങള്‍ ഞങ്ങളുടെ മുന്നില്‍ വരരുതേ " എന്നും ചുരുക്കം...
   പുരുഷവര്‍ഗത്തെ നിങ്ങള്‍ ഈ പരാമര്‍ശത്തിലൂടെ സ്വയം തരം താഴ്തുന്നല്ല്ലോ എന്നോര്‍ത്ത് സഹതാപം ആണ് തോന്നിപോകുന്നത് ..         കഷ്ടം എന്നല്ലാതെ വേറെന്തു പറയാന്‍......


                           സ്വന്തം സ്വപ്നങ്ങളെയും ആഗ്രഹങ്ങളെയും മറച്ചു വച്ച്,അടക്കിപിടിച്ചു  സ്വാതന്ത്ര്യമില്ലാതെ ഭയപ്പെട്ട് ജീവിക്കെണ്ടിവരുന്നത്‌ ഏറ്റവും വലിയ നീതി നിഷേധമാണ് ..പകരം,,സ്ത്രീയെ ബഹുമാനിക്കാനും ,അവളുടെ ശരീരത്തെ മാത്രം നോക്കികാണാതെ ഒരു വ്യക്തി എന്ന നിലയില്‍ നോക്കി കാണാനും ശ്രമിച്ചാല്‍ തന്നെ നമ്മുടെ നാട് പീഡന വിമുക്തമാകും  എന്ന സത്യം മറച്ച് വെച്ച് അവളോട്‌ ക്രുരത കാണിക്കുന്നത്  ഇത്തരക്കാരാണ് ...


                      ഇത്തരത്തില്‍ സ്വന്തം ആഗ്രഹങ്ങള്‍ക്കും സ്വപ്നങ്ങള്‍ക്കും മീതെ ക്രൂരതയുടെ കറുത്ത കരങ്ങളാല്‍ വേട്ടയാടപ്പെട്ട ഒരു പെണ്‍കുട്ടിയുടെ നേരെ,നീണ്ട 16 വര്‍ഷങ്ങള്‍ കടന്നു പോയിട്ടും നീതി നിഷേധിച്ച്  വീണ്ടും വീണ്ടും വേട്ടയാടിക്കൊണ്ടിരിക്കുന്നു..നീതി നടപ്പാക്കേണ്ട ജസ്റ്റിസ്‌ ബസന്തിനെ പോലുള്ളവരും ,നമ്മുടെ ഭരണ കൂടവും ആണ് ഇന്ന് സമുഹത്തിന് നാണക്കേട്‌ ...

              ........നീതിദേവത കണ്ണ് തുറക്കട്ടെ.....അവളുടെ പോരാട്ടങ്ങള്‍ വിജയത്തിലെത്തട്ടെ ......

Friday, 28 December 2012

ഇതോ ഭാരത സംസ്കാരം ..?


                         
                        
                                   മനുഷ്യത്വം നശിച്ച ഒരു കൂട്ടം ചെന്നായ്ക്കളുടെ വിഹാര കേന്ദ്രമായ്‌ മാറിയിരിക്കുന്നു ഇന്ന് സമുഹം .സ്ത്രീ അമ്മയാണ് ,സഹോദരിയാണ്,ബഹുമാനിക്കപെടെണ്ടവള്‍ ആണ് എന്നൊക്കെ വിശേഷിപ്പിക്കപെടുന്ന നമ്മുടെ നാട്ടില്‍ ഇന്ന് ജനിച്ചു വീഴുന്ന ഓരോ പെണ്കുഞ്ഞുങ്ങളുടെയും മാനത്തിന്  സുരക്ഷയില്ലതായിരിക്കുന്നു .സ്ത്രീ കേവലമൊരു ഉപഭോഗ വസ്തുവായ്‌ മാറിയിരിക്കുന്നു.
                 
                                മനുഷ്യമനസാക്ഷിയെ ഞെട്ടിക്കുന്ന ഇത്തരം സ്ത്രീപീഡനങ്ങള്‍ നമ്മുടെ കണ്മുന്നില്‍ നടക്കുമ്പോഴും കാണേണ്ടവര്‍ അത് കണ്ടില്ലെന്നു നടിക്കുന്നു.നമ്മുടെ അധികാര വ്യവസ്ഥിതികള്‍ പോലും അതിനു മുന്നില്‍ പ്രതികരിക്കാതെ നോക്കി നില്‍ക്കുന്നു..
                 
                             സ്വന്തം മകളോ സഹോദരിയോ എന്തിനു ,അമ്മയോ പുറത്തു പോയാല്‍ തിരികെ വരും വരെ ആധിയെടുത്തു കാത്തിരിക്കേണ്ട അവസ്ഥയാണ്‌ ഇന്ന് നാം നേരിടുന്നത്.
അച്ഛനും അമ്മയും ചേര്‍ന്ന് സ്വന്തം മകളെ കൊണ്ടുനടന്ന് വില്‍ക്കുന്നു...മാറ്റങ്ങളുടെ പുത്തന്‍ പാതയില്‍ സഞ്ചരിക്കുന്ന നമ്മുടെ സമുഹത്തിന്റെ ഇത്തരമൊരു മാറ്റം ഒട്ടും പ്രതീക്ഷിക്കുന്നതല്ല.. സംസ്കാരത്തില്‍ അത്രയേറെ മുന്നില്‍ നില്‍ക്കുന്നു എന്ന് വിശേഷിപ്പിക്കപെടുന്ന നമ്മുടെ രാജ്യത്ത് ഈ മാറ്റം മനുഷ്യമനസ്സുകളെ ഞെട്ടിപ്പിക്കുക തന്നെ ചെയ്യുന്നു..
                 
                       പെണ്ണിന്റെ ശരീരത്തെ ആര്‍ത്തിയോടെ നോക്കുന്ന കണ്ണുകള്‍ ആണ് ഇന്ന് നമുക്ക് ചുറ്റും...കാലിലെ തുണി അല്പമൊന്നു പൊങ്ങിയാല്‍ പോലും ആര്‍ത്തിയോടെ നോക്കുന്നവര്‍ ..ഒരു കൂട്ടം നരഭോജികളുടെ കയ്കളിലമര്‍ന്നു സ്വന്തം മാനം സംരക്ഷിക്കാനാവാതെ  ,പ്രതികരിക്കാനാവാതെ അതിക്രുരമായി പിടഞ്ഞു തീരുന്ന ഓരോ പെണ്ണും നമ്മുടെ ഓരോരുത്തരുടെയും സഹോദരിയാണ് ,മകളാണ് ,അമ്മയാണ്,ഭാര്യയാണ്‌ ...
സ്വകാര്യ ഇടങ്ങളിലും പൊതു നിരത്തുകളിലും അവള്‍ പീഡിപ്പിക്കപെടുന്നു....
                                 
                            
                                                ഡല്‍ഹിയില്‍ ഓടിക്കൊണ്ടിരുന്ന ബസ്സിനുള്ളില്‍ സുഹൃത്തിനൊപ്പം സഞ്ചരിച്ച പെണ്‍കുട്ടിയെ അതിക്രുരമയ് ബലാല്‍സംഘം ചെയ്ത വാര്‍ത്ത‍ ഏവരുടെയും കണ്ണ് നനയിപ്പിക്കുനതാണ്..സംഭവം നടന്നു ഇത്രയായിട്ടും സ്ത്രീകള്‍ക്കെതിരെയുള്ള ഇത്തരം അതിക്രമങ്ങള്‍ക്കെതിരെ കര്‍ശനമായ ഒരു നിയമവ്യവസ്ഥിതി കൊണ്ട് വരാന്‍ അധികാരികള്‍ക്കയിട്ടില്ല എന്ന സത്യവും നമ്മള്‍ ഒര്മിക്കെണ്ടിയിരിക്കുന്നു..
                   
                                          പൊതുനിരത്തില്‍ ഒരു സ്ത്രീ അപമാനിക്കപ്പെട്ടാല്‍ പോലും അത് കണ്ടു നോക്കി നില്‍ക്കാനല്ലാതെ അതിനെതിരെ ഒന്ന് പ്രതികരിക്കാന്‍ പോലും തയ്യാറാകാത്തവരാണ്  ജനങ്ങള്‍ ..മാത്രമല്ല ,അപമാനിക്കപെട്ട സ്ത്രീയെ മോശക്കാരിയാക്കാന്‍ ആയിരിക്കും കൂടുതല്‍ ആളുകളും ശ്രമിക്കുന്നത്..നാളെ,അവരുടെ മകള്‍ക്കോ ഭാര്യക്കോ ആണ് ഇത്തരം ഒരു അവസ്ഥ വരുന്നതെങ്കില്‍ അവര്‍ കയ് കെട്ടി നോക്കി നില്‍ക്കുമോ...?
   
                    തരം കിട്ടിയാല്‍ അശ്ലീലചുവയുള്ള സംസാരത്തിലൂടെ ഒരു തരം 'സുഖം' നേടുന്നവരുടെ എണ്ണം വര്‍ദ്ധിച്ച് വരികയാണ്‌ .ഇതിനായ്‌  പ്രത്യേകം site കളും ഇന്ന് ലഭ്യ മയെന്നും വരും.പെണ്ണിന്റെ പേര് കണ്ടാല്‍ ഉടന്‍ ചാടി വീഴുന്ന,sex chat നടത്താന്‍ ആര്‍ത്തിപൂണ്ടു നില്‍ക്കുന്ന ഇത്തരം ഞരമ്പ്‌ രോഗികള്‍ ,നാളെ അവര്‍ കാണിച്ച ഓരോ വൃത്തികേടിനും സ്വന്തം ജീവിതം കൊണ്ട് തന്നെ കണക്ക് പറയേണ്ടതായ് വരും..അര്‍ഥം വച്ചുള്ള നോട്ടങ്ങളെയും അശ്ലീലചുവയുള്ള വാക്കുകളില്‍ നിന്നും പീഡനങ്ങള്‍ക്കെതിരെയും പൊരുതി മുന്നേറാന്‍ ഇനിയുള്ള ഓരോ ചുവടിലും ഒരുപിടി വീറും സ്ഥയര്യവും കരുതി വയ്ക്കെണ്ടിയിരിക്കുന്നു..
                 
                          പിഞ്ചു കുഞ്ഞുങ്ങളെ പോലും കാമ ഭ്രാന്തോടെ നോക്കുന്ന വൃത്തികെട്ട ഒരു സമുഹം ആയി മാറിയിരിക്കുന്നു ഇന്ന് നമുക്ക് ചുറ്റുമുള്ളത് .കേവലം 3 ഉം 4 ഉം വയസുള്ള കുഞ്ഞുങ്ങളെ വാത്സല്യത്തോടെ അല്ലാതെ എങ്ങനെയാണു കാണാന്‍ കഴിയുന്നത്‌ .....  ഓമനത്തം തുളുമ്പുന്ന അവരുടെ നിഷ്കളങ്കമായ മുഖത്തെ എങ്ങനെയാണു കാമം നിറയുന്ന കണ്ണുകളിലൂടെ നോക്കാന്‍  കഴിയുന്നത്‌ ...
  ഒന്നുമറിയാത്ത,,കളിച്ചു നടക്കേണ്ട ആ പ്രായത്തെ പോലും നിഷ്ടുരമായ്  പിച്ചി ചീന്താന്‍ എങ്ങനെ കഴിയുന്നു. ... ഇത്രയേറെ അധപതിച്ചുപോയോ നമ്മുടെ സമുഹം എന്നോര്‍ക്കുമ്പോള്‍ ലജ്ജ തോന്നിപോവുന്നു ..
                                
                            ഒന്ന്  ഓര്‍ത്ത്‌ കൊള്ക അവള്‍ പുളഞ്ഞ ഓരോ വേദനക്കും അവള്‍  നീറിയ  ഓരോ നീറ്റലിനും നീ കണക്കു പറയാതെ പൊവില്ല... തൂക്കുകയര്‍ പോലും നീ അര്‍ഹിക്കുനില്ല,,, എതവയവം വച്ച് നീ ഒരു പെണ്ണിനെ പീഡിപ്പിക്കുന്നുവോ ആ അവയവം ചേദിക്കുന്ന ഒരു നിയമം.... അതാണ് ഇനി വേണ്ടത് .. ചങ്കുറ്റം ഉള്ള ഒരു ഭരണാധികാരി എങ്കിലും ഇവിടെ ശേഷിക്കുന്നു എങ്കില്‍ നടപ്പിലാക്കി കാണിക്കു ഈ നിയമം.. ഇനിയെങ്കിലും ... സ്വന്തം അമ്മയുടേയും  പെങ്ങന്മാരുടെയും മാനത്തിനു വില കല്പിക്കുന്നുവെങ്കില്‍ മാത്രം ...
                 
                     സ്ത്രീ ശരീരം ആര്‍ക്കും തട്ടി കളിക്കാനുള്ള ഒരു വസ്തുവല്ല.....അവളുടെ ശരീരത്തില്‍ അനാവശ്യമായ്  സ്പര്‍ ശിക്കാന്‍  ഒരുത്തനും അവകാശമില്ല....അമ്മയെയും പെങ്ങളേയും തിരിച്ചറിയാത്ത കുടുംബത്തില്‍ പിറക്കാത്ത വൃത്തികെട്ടവന്മാരെ, പ്രതികരിക്കാതെ ഇരിക്കാന്‍ ഇനി ഞങ്ങള്‍ക്കാവില്ല .......
                       




Wednesday, 12 December 2012

കൂടെപോന്നവള്‍


                                                  വിളിച്ചിറക്കിയപ്പോള്‍
                                                  വേച്ചു വേച്ചു  നീയെന്‍ -
                                                  കൈയ്തലം പിടിച്ചപ്പോഴും
                                                  തിരിഞ്ഞു നോക്കാതെ
                                                  എന്‍ ഉറച്ച കാലടികളെ
                                                  പിന്തുടര്‍ന്നപ്പോഴും
                                                  നിന്റെ വസന്തത്തിന്റെ
                                                  ഇതളടരാപൂമൊട്ടുകള്‍
                                                  എനിക്കായ് നിവേദിച്ചപ്പോഴും
                                                  ഇടറിയ വാക്കും
                                                  പതറിയ നോക്കുമായ്
                                                  ഉരുകി ഉരുകി നീ-
                                                  ഇല്ലാതാകുന്നത് ഞാനറിഞ്ഞു.
                                                  അടിവയറ്റിലെ വേദനകൊണ്ട്
                                                  ആരുമറിയാതെ പുളയുമ്പോഴും
                                                  പുകയടുപ്പൂതിയൂതി
                                                  പകലിരുട്ടിക്കുന്നു നീ.
                                                  ഒടുവില്‍,നിഴലകന്ന രാത്രികളില്‍
                                                  തളര്‍ന്നു നീയുറങ്ങവേ
                                                  നിറം വറ്റിയ നിന്‍ ഇടംകഴുത്തില്‍
                                                  ഞാന്‍ ച്ചുംബിക്കുമ്പോഴെങ്കിലും
                                                  കൂടെപോന്നവളെ
                                                  നിനക്കൊന്ന്-
                                                  വിതുമ്പി വിതുമ്പി കരയരുതോ...
                 

Tuesday, 13 November 2012

സ്വപ്നം

                                    
                                    

                                       ഉദരത്തിന്റെ ഉള്‍ചൂടില്‍ നിന്നും
                                       കാത്തിരിപ്പിന്റെ
                                       ഒരാദ്യകരച്ചിലുമായ്
                                       തുറന്നുവച്ച,
                                       ആകാശത്തിനു കീഴേക്കിറങ്ങിയെത്താന്‍
                                       ആദ്യസ്വപ്നം..
                                       പിന്നെ,
                                       പാല്‍മണം മാറും മുന്‍പേ
                                       നിലയുറയ്ക്കാത്ത കാലുകളില്‍
                                       നിഴലിനെ ഓടിപ്പിടിക്കണമെന്നും
                                       തണലുവീണ  വഴികളില്‍
                                       താങ്ങായ് നിന്ന കരങ്ങളാല്‍
                                       പിച്ചവച്ച് തുടങ്ങിയപ്പോഴേക്കും
                                       കരുതലിന്റെ കരങ്ങള്‍ വിടുവിച്ച്
                                       കൂടുവിട്ട് പറക്കണമെന്നും സ്വപ്നം..
                                       ഒടുവിലൊരു നിമിഷത്തില്‍,
                                       കണ്ട സ്വപ്നങ്ങളൊക്കെയും
                                       കയ് വിടുനെന്നായപ്പോള്‍
                                       അത് കൌമാരമെന്നറിഞ്ഞു..
                                       ഇന്ന്,
                                       ഇരുള്‍വീഥികളില്‍
                                       മിഴിത്തുള്ളികളായ്
                                       ഓര്‍മ്മകള്‍ പെയ്തുതീരുന്നു..
                                       നാളെ,
                                       പുതിയ പുലരി വിരിയുമ്പോള്‍
                                       പാതിനിലച്ച സ്വപ്നങ്ങളെ
                                       നീര് വറ്റിയ സിരകളിലേക്ക്
                                       ഒരിക്കല്‍ക്കൂടി കുടഞ്ഞിടണം..
                                       ഒരുപക്ഷെ,
                                       നിലച്ചുപോയ സിരകളില്‍
                                       എന്റെ സ്വപ്നങ്ങള്‍ക്കൊരു
                                       പുനര്‍ജ്ജനി കാത്തിരിപ്പുവെങ്കിലോ ...

Sunday, 16 September 2012

"സദാചാരം ?"

 


                                              വഴിയരികിലെ ചായക്കടയില്‍,
                                              നഗരങ്ങളിലെ നിശാപാര്‍ട്ടികളില്‍,
                                              ആളനക്കമുള്ള ബസ്‌സ്റ്റോപ്പ്കളില്‍,
                                              ആള്‍തിരക്കുള്ള വീഥികളില്‍,
                                              ഒക്കെയും,
                                              പിന്തുടരുന്നതെന്തിനാണ് ?
                                              അവള്‍ അവനോടും,
                                              അവന്‍ അവളോടും,
                                              വാ തുറന്നപ്പോള്‍ 
                                              കയ്കോര്‍ത്തു നടന്നപ്പോള്‍ 
                                              ഒരു കപ്പ്‌ കാപ്പി കുടിച്ചപ്പോള്‍ 
                                              നിങ്ങള്‍ എന്തിന് 
                                              പല്ലിറുക്കുന്നു ?
                                              മുഷ്ടി ചുരുട്ടുന്നു?
                                              പെരുവിരലില്‍-
                                              നിന്നരിച്ചുകേറും
                                              കലിപ്പ് തീര്‍ക്കണമെങ്കില്‍,
                                              നടന്നുവന്ന വഴികളില്‍ 
                                              നിലവിളികളുതിര്‍ന്ന 
                                              നിലാവ് മറഞ്ഞ 
                                              കണ്ടിട്ടും കാണാതെ നടിച്ച 
                                              ഓരങ്ങളിലേക്ക്‌ 
                                              ഒന്ന് തിരിഞ്ഞുനടക്കുക.
                                              മകളെ പീഡിപ്പിച്ച,
                                              അച്ഛനും  
                                              അമ്മയെ കഴുത്തറുത്ത,
                                              മകനും 
                                              വെയില്‍ കായാനിറങ്ങിയിട്ടുണ്ട് .

Saturday, 8 September 2012



                                               "ഇനിയുമൊരു ജന്മമുണ്ടെങ്കില്‍
                                                      വിരിയേണമൊരു,
                                                     പൂവിന്‍മുഴുജന്മം......"

Wednesday, 18 July 2012

പറയുമോ നീ ..

                                            
                                             





                                              എന്റെ വാക്കുകള്‍
                                      നിന്നെ വേദനിപ്പിക്കുന്നുവെങ്കില്‍ 
                                         ഞാനവയ്ക്ക് വിലങ്ങു വെയ്ക്കാം.
                                           നിനക്ക് വേണ്ടി മാത്രം.
                                                  പക്ഷെ,
                                              എന്റെ മൌനം
                                      നിന്നെ വേദനിപ്പിക്കുമെങ്കില്‍ 
                                     പിന്നെ ഞാന്‍ എന്തു ചെയ്യണം.?

Thursday, 7 June 2012

എന്റെ കലാലയം

                  
                      
                                     ഓര്‍മകളില്‍ തേങ്ങലും തലോടലും സമ്മാനിച്ച നീണ്ട നാല് വര്‍ഷങ്ങള്‍ .ഓര്‍ത്തിരിക്കാന്‍ ഒരുപാടു തന്ന,മറക്കാനാവാത്ത വിരലിലെണ്ണാവുന്ന സുഹൃത്തുക്കളെ സമ്മാനിച്ച ജീവിതത്തിന്റെ ഏറ്റവും വില പിടിച്ച നിമിഷങ്ങള്‍ പകര്‍ന്നു തന്ന എന്റെ കലാലയം ...ഇണങ്ങിയും പിണങ്ങിയും കളി പറഞ്ഞു നടന്ന ദിനങ്ങള്‍..സ്വപ്നങ്ങള്‍ക്ക് നിറങ്ങള്‍ പകര്‍ന്നു തന്ന നാല് വര്‍ഷങ്ങള്‍.....
       വര്‍ഷങ്ങള്‍ എത്ര വേഗം കടന്നു പോയിരിക്കുന്നു.ഓര്‍ക്കുമ്പോള്‍ എല്ലാം ഇന്നലെ കഴിഞ്ഞ പോലെ..
ഒന്നും അറിയാതെ നെഞ്ചിടിപ്പോടെ സീനിയര്‍സിനെ പേടിച്ചു ഇടറുന്ന കാലടികളോടെ ആദ്യമായ് കലാലയത്തിന്റെ പടി ചവിട്ടിയത് ഇന്നും മായാതെ ഓര്‍മയില്‍ കിടക്കുന്നു..പിന്നിടങ്ങോട്ടുള്ള യാത്രയില്‍ ഏതോ മുന്‍ നിമിത്തം പോലെ നമ്മള്‍ സുഹൃത്തുക്കളായി.
ഇന്റെര്‍വല്‍ ന്റെ 10 മിനിറ്റില്‍ ക്യാന്റീന്‍  പോയ്‌ ചൂട് കാപ്പി കുടിച്ച്‌ ,തിരികെ മഴ നനഞ്ഞു എത്തിയപ്പോള്‍ സര്‍ ന്റെ ചോദ്യത്തിനു മുന്‍പില്‍ നുണ പറഞ്ഞു തടിതപ്പിയ എത്രയോ ദിനങ്ങള്‍..
                                1st ഇയര്‍  ന്റെ ദിനങ്ങള്‍ വളരെ പെട്ടെന്ന് കടന്നു പോയിരുന്നു..ഓര്‍ക്കാന്‍ അധികം ഒന്നും ഇല്ലെങ്കിലും പിന്നീടുള്ള ഓരോ ഇയര്‍  ഉം ഒരു ജന്മം മുഴുവന്‍ ഓര്‍ക്കാനുള്ള നിമിഷങ്ങള്‍ ആയിരുന്നു നല്‍കിയത്.
             2nd ഇയര്‍  ലേക്ക് കാലെടുത്തുവച്ച ദിനങ്ങള്‍.ഞാനും senior ആയി എന്നതിന്റെ അഹങ്കാരം ചെറുതൊന്നും അല്ലായിരുന്നു.എങ്കിലും 3rd ഇയര്‍  ഉം 4th ഇയര്‍സ്  ഉം ഇടക്കൊക്കെ ആ അഹങ്കാരത്തിന് കടിഞ്ഞാണിട്ടു .ഓണം,ക്രിസ്മസ്,ആര്‍ട്സ് ,5 ഡേ നീണ്ടു നിന്ന ഡി സോണ്‍ അങ്ങനെ എത്രഎത്ര ആഘോഷങ്ങള്‍ ..പിന്നെ മറക്കാനാവാത്ത ടൂര്‍ കളും ..എല്ലാം ആവുന്നത്ര ആഘോഷിച്ചു.
സൌഹൃദത്തിന് ആഴം കൂടി വന്ന ദിനങ്ങള്‍.എന്തിനും ഏതിനും സുഹൃത്തുക്കള്‍ എല്ലാം ആയി തീര്‍ന്ന ദിനങ്ങള്‍..ആ വര്‍ഷവും അങ്ങനെ കടന്നു പോയിരിക്കുന്നു..
              3rd ഇയര്‍  ..അഹങ്കാരം പറഞ്ഞറിയിക്കേണ്ട കാര്യമില്ലലോ..ക്ലാസ്സ്‌ കട്ട്‌ ചെയ്യല്‍ സര്‍വസാധാരണമായിരിക്കുന്നു..(അല്ലെങ്കില്‍ ഇല്ല എന്ന് അല്ലാട്ടോ).പിന്നെ notes complete ചെയ്യാനുള്ള ഓടിപ്പയാല്‍ ആണ്..assignment ,mini project അങ്ങനെ എല്ലാം കൂടി busy days ..attendance shortage മാറ്റാന്‍ teachers ന്റെ കാലുപിടിക്കല്‍..അതിനിടയിലെ ഒരുപാടു ആഘോഷങ്ങള്‍..അതിന്റെ പേരിലുള്ള duty leave നു ആയുള്ള ഓട്ടം..അങ്ങനെ ഓടിപ്പാഞ്ഞു നടന്ന ദിനങ്ങള്‍ ആയി ആ വര്‍ഷവും കടന്നുപോയ്..
            വിടപറയലിന്റെ നൊമ്പരങ്ങള്‍ നല്കാന്‍ കടന്നു വന്ന നാലാം വര്‍ഷം..ഒരുപക്ഷെ,ഓര്‍ക്കാന്‍ ഒരുപാടു ഉണ്ടായിരുന്നിട്ടും,ഓര്‍മ്മിക്കാന്‍ നമ്മുടെ മനസ്സില്‍ ഇഷ്ടപ്പെടുന്ന ദിനങ്ങള്‍ അവസാന വര്‍ഷത്തെതായിരിക്കാം..ഓര്‍മയില്‍ മായാതെ കിടക്കുന്നതും അതായിരിക്കാം.അല്ലെ?..അത്രമാത്രം ആഘോഷിച്ചു തീര്‍ത്ത വര്‍ഷം..ഓണം,ക്രിസ്മസ് അങ്ങനെ എല്ലാം മായാതെ കിടക്കുനത് ആ വര്‍ഷത്തെയാണ് ഞങ്ങള്‍ക്ക്..തേച്ചു മിനുക്കിയ ഷര്‍ട്ട്‌ ന്റെയും മുണ്ടിന്റെയും കസവ് സാരിയുടെയും ഐശ്വര്യത്തോടെ പൂക്കളം  തീര്‍ത്തു തൃക്കരപ്പനെ വച്ച്,ഇലയിട്ടു സദ്യ വിളമ്പി ഒരുമിച്ചിരുന്നു ഉണ് കഴിച്ച ആ ദിനം ഒരിക്കലും മറക്കില്ലെന്ന് ഒരായിരംവട്ടം ഉറപ്പാണ്‌..അത്രമാത്രം ഞങ്ങള്‍ക്ക് പ്രിയപെട്ടതയിരുന്നു ആ ഓണം..പിന്നെ ക്രിസ്മസ് ..ഓണത്തിന്റെ അത്ര കേമമായില്ലെങ്കിലും,അവസാന വര്‍ഷത്തെ ആഘോഷമെന്ന നിലക്ക് ഓര്‍മയില്‍ അതും മായാതെ കിടക്കുന്നു..
          ഇനിയുള്ളത് പോകാന്‍ നേരത്തെ ഏറ്റവും വിലപിടിച്ച നിമിഷങ്ങള്‍ സമ്മാനിച്ച 3 ദിവസം നീണ്ടു നിന്ന "ദൃഷ്ടി" എന്ന ഫെസ്റ്റ്  ആയിരുന്നു..രാത്രി വരെ നീണ്ടു നിന്ന ആഘോഷങ്ങള്‍..അതെ,അന്നാദ്യമായാണ് രാത്രിയിലെ നിലാവിന്റെ അകമ്പടിയില്‍ ദീപാലംകൃതമായ കലാലയത്തിന്റെ സൌന്ദര്യം നമ്മള്‍ വേണ്ടുവോളം ആസ്വദിച്ചത്..നിലാവില്‍  ഒരായിരം വര്‍ണങ്ങളില്‍ മുങ്ങി കുളിച്ചു നില്‍ക്കുന്ന ഒരു സുന്ദരിയെ പോലെ ഓരോരുത്തരുടെയും മനസ്സില്‍ ഇന്നും മായാതെ കിടപ്പുണ്ടാകും ആ കാഴ്ച..ആ 3 ദിനങ്ങളും കടന്നു പോയിരുന്നു.കലാലയ ജീവിതത്തിന്റെ അവസാന ആഘോഷങ്ങള്‍..
     പിന്നെ നമ്മുടെ main project .tvm bsnl ലേക്ക് project നു ആയുള്ള യാത്ര ഒരു ടൂര്‍ ആയി തന്നെ ആഘോഷിച്ചു ..ഒരുമിച്ചു ഉണ്ടും ഉറങ്ങിയും ദിനങ്ങള്‍.hostel ന്റെ 4 ചുമരുകള്‍ക്കുള്ളില്‍ കളിച്ചും തമാശ പറഞ്ഞും കഴിച്ച  ഉറക്കമില്ലാത്ത രാത്രികള്‍..രാവിലെ ഓടിപ്പിടഞ്ഞു ക്ലാസ്  നു പോകാനുള്ള തിരക്ക്..ക്ലാസ്സ്‌  കഴിഞ്ഞുള്ള "കറങ്ങാന്‍"പോകല്‍..തിരികെ നാട്ടിലേക്കുള്ള ട്രൈന്‍  കേറുമ്പോള്‍ എല്ലാവരുടെയും മനസ്സില്‍ ഒരു നൊമ്പരം..ഇനി ഇല്ല ഇങ്ങനെ ഒരുമിച്ചൊരു യാത്ര..അതെ,എല്ലാം തീര്‍ന്നിരിക്കുന്നു..തിരിച്ചു നാട്ടില്‍ എത്തിയപ്പോഴും എല്ലാവരുടെയും മനസ്സില്‍ ഒരു നഷ്ടബോധം മുള പൊട്ടിയിരുന്നു..ഒരിക്കലും തിരിച്ചുകിട്ടാത്ത കഴിഞ്ഞുപോയ സ്വപ്നനിമിഷങ്ങളെ ഓര്‍ത്തു..
                            അതെ,എല്ലാം നഷ്ടപെടുകയാണ് ഇനി..സമരപ്പന്തലുകളാല്‍ പ്രക്ഷുബ്ദമായ ക്ലാസ്സ്മുറികള്‍ ,കയ്‌ കോര്‍ത്ത്‌ നടന്ന നീണ്ട ഇടനാഴികള്‍,.ഒഴിവു വേളകളില്‍ "കത്തി "വച്ചിരുന്ന ഗോവണിപ്പടികള്‍,.ക്ലാസ്സ്‌ കട്ട്‌ ചെയ്തു assignment എഴുതി തീര്‍ക്കാനും ,b'day ആഘോഷിക്കാനായും ഒത്തു കൂടുന്ന കാന്റീന്‍.,പിന്നെ,കോളേജ് മാഗസിന്‍ ല്‍ ആരോ എഴുതിയിട്ട പോലെ "മെയിന്‍ ബ്ലോക്കിലേക്ക് തിരിയുന്നിടത്തെ മഞ്ഞ പൂക്കള്‍ പൊഴിക്കുന്ന ആ മരവും"...
                    അതെ,ഇവിടെ ഇ ക്ലാസ്സ്‌ മുറികളിലെ ഓരോ ഇരിപ്പിടവും ഇനിയും എന്തൊക്കെയോ എന്നോട് പറയാന്‍ ബാക്കി വച്ച പോലെ...ഒരു പക്ഷെ ഒരു നഷ്ട സൌഹൃദത്തിന്റെ ,അതുമല്ലെങ്കില്‍,വെയിലും മഴയും മാറി മാറി വന്നപ്പോഴും ഒരു കുടക്കീഴില്‍ ഒരുമിച്ചു ചേര്‍ന്ന നമ്മുടെ സൌഹൃദത്തെപറ്റി...നടന്നു വന്ന പാതകളില്‍ ഒക്കെയും ഇ കലാലയത്തില്‍ നാം ചിലവഴിച്ച ഓരോ നിമിഷവും മായാതെ കിടപ്പുണ്ട്..
പറയാതെ പോയ വാക്കുകളില്‍ അറിയാതെ പോയ ഒരു പ്രണയം ഓരോ ക്ലാസ്സ്‌ മുറികളിലും നമ്മെ തേടുന്നുണ്ടാകാം..പിന്നെ,പറഞ്ഞുപോയ വാക്കുകളില്‍ മുറിഞ്ഞുപോയ ഒരുപാട് സൌഹൃദങ്ങളും...
                              
                                അതെ ഇവിടെയാണ് ഞങ്ങളുടെ സ്വര്‍ഗം..




                                                 


                                                
    Dedicated to all my dear friends.....
                                                 
                                          miss u all ... 

Wednesday, 16 May 2012

നിനക്ക്

"ഒരു വാക്ക് 
ഒരു നോക്ക് 
ഒരു നീലാകാശം 
മഴ പെയ്തു തോര്‍ന്ന് 
പൂവിട്ട പ്രഭാതം
ഒരു നാലിതള്‍ പൂവ് .
ഞാന്‍ 
എന്റെ ജന്മം 
രണ്ട് കണ്ണുനീര്‍ തുള്ളി.
ഇതിലുമുപരി 
ഇനിയെന്ത് നല്‍കണം ?"

Wednesday, 11 April 2012

രാത്രിയുടെ നിലവിളി

കരിവളയുടഞ്ഞുതിര്‍ന്ന
ചുടുചോരയില്‍ കണ്ടത്
വര്‍ണങ്ങളുടെ 
വെറും ലയനങ്ങള്‍.
കിടപ്പറയുടെ വിമൂഖതകളില്‍ 
മറന്നുവച്ച നിശ്വാസങ്ങള്‍.
ഒരു വിളിപ്പാടകലെ
കൊഴിഞ്ഞു വീണ മോഹങ്ങള്‍.
അനാഥമായ നിലവിളികള്‍ക്കൊടുവില്‍
തളര്‍ന്നു വീണ ശരീരങ്ങള്‍.
അസ്തമയ സൂര്യന്‍ 
രാത്രിയെ വിളിച്ചുണര്‍ത്തി.
നിലാവ് അറിയാത്ത ഭാവം നടിച്ച്
എങ്ങോ പോയൊളിച്ചു.
ഇനിയുള്ളത് ,
മിഴികളിറുക്കിയടച്ചു 
നീണ്ടു പോകുന്ന ഇരുള്‍ വഴികളിലേക്ക് 
തിരിഞ്ഞുനോക്കാനാകാതെയുള്ള
വീഴ്ചകളാണ് ....

Tuesday, 27 March 2012

നിനക്കായ്‌...

ഒരു മഹാസാഗരം നിന്‍
ഹൃദയ വീഥിയില്‍ ഒഴുകീടുകില്‍
അതിലോരുകണമേറ്റെന്‍
ഹൃദയവേദന നീങ്ങിടുകില്‍
ഇനിയെനിക്കാവതില്ല
നിന്‍ ഇളംതെന്നലേറ്റതിന്‍
തലോടലിലോഴുകി നിന്‍-
ജീവിതയാത്രയിലൊരു
നീര്‍മുത്തായ്‌ അലിയാതിരിക്കുവാന്‍.
ഇനിയീ വേദനകളില്‍
താങ്ങായ്‌,തണലായ്‌
തരിയകലമിടാതൊരു-
തിരിനാളമായ് നിന്‍-
വഴികളില്‍ വെളിച്ചം
വിതറിടുവാനിനിയെന്നും,
നിനക്കായ്‌.....
നിനക്കായ്‌ മാത്രം......