ചിരിക്കാനറിയാതെ ....വിതുമ്പനറിയാതെ ....
എന്റെ നൊമ്പരമത്രയും കാറ്റുകൊണ്ട്പോവാതെ
നേര്‍ത്തു നേര്‍ത്തു പെയ്യുകയാണ് ഞാന്‍ .........
Showing posts with label കവിത. Show all posts
Showing posts with label കവിത. Show all posts

Wednesday, 9 October 2013








കടംകൊണ്ട വാക്കുകളിൽ
ഞാനഭയം തേടുമ്പോൾ
നീയെനിക്കായ്
ആശ്വാസവാക്കുകൾ പൊഴിക്കരുത്.
തിരിച്ചു നല്കാൻ
ഇനിയെന്നിൽ ഒന്നും അവശേഷിക്കുന്നില്ല .
തിരിഞ്ഞു നടക്കാൻ
ഇനിയെനിക്ക് പാതകളില്ല .
ഓര്മകളുടെ തണലിൽ
ഞാനിനിയൊരു കൂടോരുക്കട്ടെ.
അന്ന്,
എന്നെ തളര്തുന്ന നിന്റെ മൊഴികൾ
നീയെന്നില്നിന്നും തിരിച്ചെടുക്കുക..
കടലെടുത്ത സ്വപനങ്ങൾ
കൂട്ടിവെച്ചിനി
വരുംജന്മം നമുക്ക് തീര്ക്കാം .
സ്വപനങ്ങളുടെ വാതിലുകൾ
ഞാൻ താഴിട്ടു പൂട്ടുന്നു..
ഞാനറിയാത്ത എന്റെ വഴികളിൽ
ഇനി മരണമെന്ന സത്യം.
നീയെനിക്കു മാപ്പ് തരിക.....

Saturday, 31 August 2013

നീ നിശബ്ദയായിരുന്നു






 നിശബ്ദതയുടെ ചരട്
നീ പൊട്ടിച്ചെറിഞ്ഞപ്പോഴും 
വാക്കുകൾ ഇടറി 
നീ താഴെ വീണപ്പോഴും 
അവൻ നിനക്ക് 
ആരെല്ലാമോ ആയിരുന്നു .
ഒരിക്കൽ 
ഓർമ നശിച്ച അവൻ 
ഓർത്തെടുത്തത്‌ 
നിൻറെ പേര് മാത്രം.
പക്ഷെ ,നീ അവനെ മറന്നു.
നിനക്കവൻ ആരുമല്ലായിരുന്നു .
നീ  നിശബ്ദയായിരുന്നു .

Monday, 10 June 2013

പുനര്ജന്മം





                                                       നീയറിഞ്ഞുവോ
                                                       ഇന്നെന്റെ മന്ദാരങ്ങളിൽ
                                                       നിനക്കായ്‌ വിടർന്ന  പൂവിനെ ...
                                                       ഗുൽമോഹർ പൂത്ത വഴികളിൽ
                                                       നിനക്കായ്‌ കാത്തിരുന്ന ദിനങ്ങളെ ...
                                                       വസന്തത്തിന്റെ ,
                                                       തളിർത്ത  ചില്ലകളിൽ
                                                       നിനക്കായ്‌ ഒരുക്കിയ നിറഭേദങ്ങൾ ...
                                                       നീ ചുംബിച്ചുലച്ച എന്റെ ചുണ്ടുകൾ ...
                                                       ജന്മാന്തരങ്ങളിൽ
                                                       നീ പൂവായും
                                                       ഞാൻ വണ്ടായും
                                                       ഇനി ജനിക്കാം ...
                                                       ഋതുഭേദങ്ങളിൽ
                                                       നമുക്ക് കയ്മാറാം
                                                       ബാക്കിയാക്കിയ
                                                       ഒരുപിടി സ്വപ്‌നങ്ങൾ ...

Saturday, 6 April 2013

ജനറേഷൻഗ്യാപ്‌


                               
                           
                                                          പണ്ട് ,വക്ക് പൊട്ടിയ സ്ലേറ്റിൽ
                                                          മറന്നുവച്ച പുസ്തകത്താളിൽ
                                                          അടരാൻ വയ്യാത്ത വിധം
                                                          നീ കുറിച്ചിട്ട വാക്കുകൽ
                                                          ഇന്ന് ,ലാപ്ടോപ്ന്റെ 
                                                          തെളിഞ്ഞ സ്ക്രീനിൽ
                                                          പരസ്പരം പഴിച്ച്
                                                          ചോദ്യംചെയ്തൊടുവിൽ
                                                          ഡിലീറ്റ് ബോക്സിലേക്ക് ....

Tuesday, 5 March 2013

പുകയുന്ന ചോദ്യം

                                 


                                                              
                                                                 വിറളി പൂണ്ടവന്റെ
                                                            കാമ ഭ്രാന്തുകള്‍ക്കെതിരെ
                                                                  ഒച്ചയെടുത്തവള്‍
                                                        പിറ്റേന്ന് ,വാര്‍ത്തകളില്‍ താരം.
                                                                വോട്ടെടുപ്പ് തുടങ്ങി.
                                                             അഭിപ്രായ കോളത്തില്‍
                                                               അവര്‍ രേഖപ്പെടുത്തി
                                                      "പെണ്ണ് പുറത്തിറങ്ങേണ്ടത്തവള്‍".
                                                          "ന:സ്ത്രീ സ്വാതന്ത്ര്യമര്ഹതി".
                                                             മറ്റു ചിലര്‍ രേഖപ്പെടുത്തി.
                                                            "അവള്‍ ഒരു അഹംകാരി".
                                                               കൂട്ടത്തില്‍ ഒറ്റപെട്ട്
                                                                പുകഞ്ഞു പുകഞ്ഞു
                                                                    ഒരു ചോദ്യം..
                                                              "വിലങ്ങ് വയ്ക്കേണ്ടത്
                                                            സ്ത്രീ സ്വാതന്ത്ര്യത്തെയോ
                                                                       അതോ,
                                                                കഴുക കണ്ണുകളിലെ
                                                               കാമ ഭ്രാന്തിനെയോ ?".
                                                            തുരുമ്പെടുത്ത തത്വങ്ങള്‍
                                                                 വിളമ്പിയവരുടെ
                                                                നാവിനോരുത്തരം-
                                                       നല്കാനവാത്തത്‌ കൊണ്ടാവണം,
                                                                ഉത്തരങ്ങളില്ലാതെ
                                                            വീര്‍പ്പുമുട്ടി പൊറുതിമുട്ടി 
                                                              അത്തരം ചോദ്യങ്ങള്‍
                                                   വീണ്ടും വീണ്ടും പൊട്ടിത്തെറിക്കുന്നത് ....
   




      

Wednesday, 12 December 2012

കൂടെപോന്നവള്‍


                                                  വിളിച്ചിറക്കിയപ്പോള്‍
                                                  വേച്ചു വേച്ചു  നീയെന്‍ -
                                                  കൈയ്തലം പിടിച്ചപ്പോഴും
                                                  തിരിഞ്ഞു നോക്കാതെ
                                                  എന്‍ ഉറച്ച കാലടികളെ
                                                  പിന്തുടര്‍ന്നപ്പോഴും
                                                  നിന്റെ വസന്തത്തിന്റെ
                                                  ഇതളടരാപൂമൊട്ടുകള്‍
                                                  എനിക്കായ് നിവേദിച്ചപ്പോഴും
                                                  ഇടറിയ വാക്കും
                                                  പതറിയ നോക്കുമായ്
                                                  ഉരുകി ഉരുകി നീ-
                                                  ഇല്ലാതാകുന്നത് ഞാനറിഞ്ഞു.
                                                  അടിവയറ്റിലെ വേദനകൊണ്ട്
                                                  ആരുമറിയാതെ പുളയുമ്പോഴും
                                                  പുകയടുപ്പൂതിയൂതി
                                                  പകലിരുട്ടിക്കുന്നു നീ.
                                                  ഒടുവില്‍,നിഴലകന്ന രാത്രികളില്‍
                                                  തളര്‍ന്നു നീയുറങ്ങവേ
                                                  നിറം വറ്റിയ നിന്‍ ഇടംകഴുത്തില്‍
                                                  ഞാന്‍ ച്ചുംബിക്കുമ്പോഴെങ്കിലും
                                                  കൂടെപോന്നവളെ
                                                  നിനക്കൊന്ന്-
                                                  വിതുമ്പി വിതുമ്പി കരയരുതോ...
                 

Tuesday, 13 November 2012

സ്വപ്നം

                                    
                                    

                                       ഉദരത്തിന്റെ ഉള്‍ചൂടില്‍ നിന്നും
                                       കാത്തിരിപ്പിന്റെ
                                       ഒരാദ്യകരച്ചിലുമായ്
                                       തുറന്നുവച്ച,
                                       ആകാശത്തിനു കീഴേക്കിറങ്ങിയെത്താന്‍
                                       ആദ്യസ്വപ്നം..
                                       പിന്നെ,
                                       പാല്‍മണം മാറും മുന്‍പേ
                                       നിലയുറയ്ക്കാത്ത കാലുകളില്‍
                                       നിഴലിനെ ഓടിപ്പിടിക്കണമെന്നും
                                       തണലുവീണ  വഴികളില്‍
                                       താങ്ങായ് നിന്ന കരങ്ങളാല്‍
                                       പിച്ചവച്ച് തുടങ്ങിയപ്പോഴേക്കും
                                       കരുതലിന്റെ കരങ്ങള്‍ വിടുവിച്ച്
                                       കൂടുവിട്ട് പറക്കണമെന്നും സ്വപ്നം..
                                       ഒടുവിലൊരു നിമിഷത്തില്‍,
                                       കണ്ട സ്വപ്നങ്ങളൊക്കെയും
                                       കയ് വിടുനെന്നായപ്പോള്‍
                                       അത് കൌമാരമെന്നറിഞ്ഞു..
                                       ഇന്ന്,
                                       ഇരുള്‍വീഥികളില്‍
                                       മിഴിത്തുള്ളികളായ്
                                       ഓര്‍മ്മകള്‍ പെയ്തുതീരുന്നു..
                                       നാളെ,
                                       പുതിയ പുലരി വിരിയുമ്പോള്‍
                                       പാതിനിലച്ച സ്വപ്നങ്ങളെ
                                       നീര് വറ്റിയ സിരകളിലേക്ക്
                                       ഒരിക്കല്‍ക്കൂടി കുടഞ്ഞിടണം..
                                       ഒരുപക്ഷെ,
                                       നിലച്ചുപോയ സിരകളില്‍
                                       എന്റെ സ്വപ്നങ്ങള്‍ക്കൊരു
                                       പുനര്‍ജ്ജനി കാത്തിരിപ്പുവെങ്കിലോ ...

Sunday, 16 September 2012

"സദാചാരം ?"

 


                                              വഴിയരികിലെ ചായക്കടയില്‍,
                                              നഗരങ്ങളിലെ നിശാപാര്‍ട്ടികളില്‍,
                                              ആളനക്കമുള്ള ബസ്‌സ്റ്റോപ്പ്കളില്‍,
                                              ആള്‍തിരക്കുള്ള വീഥികളില്‍,
                                              ഒക്കെയും,
                                              പിന്തുടരുന്നതെന്തിനാണ് ?
                                              അവള്‍ അവനോടും,
                                              അവന്‍ അവളോടും,
                                              വാ തുറന്നപ്പോള്‍ 
                                              കയ്കോര്‍ത്തു നടന്നപ്പോള്‍ 
                                              ഒരു കപ്പ്‌ കാപ്പി കുടിച്ചപ്പോള്‍ 
                                              നിങ്ങള്‍ എന്തിന് 
                                              പല്ലിറുക്കുന്നു ?
                                              മുഷ്ടി ചുരുട്ടുന്നു?
                                              പെരുവിരലില്‍-
                                              നിന്നരിച്ചുകേറും
                                              കലിപ്പ് തീര്‍ക്കണമെങ്കില്‍,
                                              നടന്നുവന്ന വഴികളില്‍ 
                                              നിലവിളികളുതിര്‍ന്ന 
                                              നിലാവ് മറഞ്ഞ 
                                              കണ്ടിട്ടും കാണാതെ നടിച്ച 
                                              ഓരങ്ങളിലേക്ക്‌ 
                                              ഒന്ന് തിരിഞ്ഞുനടക്കുക.
                                              മകളെ പീഡിപ്പിച്ച,
                                              അച്ഛനും  
                                              അമ്മയെ കഴുത്തറുത്ത,
                                              മകനും 
                                              വെയില്‍ കായാനിറങ്ങിയിട്ടുണ്ട് .

Saturday, 8 September 2012



                                               "ഇനിയുമൊരു ജന്മമുണ്ടെങ്കില്‍
                                                      വിരിയേണമൊരു,
                                                     പൂവിന്‍മുഴുജന്മം......"

Wednesday, 18 July 2012

പറയുമോ നീ ..

                                            
                                             





                                              എന്റെ വാക്കുകള്‍
                                      നിന്നെ വേദനിപ്പിക്കുന്നുവെങ്കില്‍ 
                                         ഞാനവയ്ക്ക് വിലങ്ങു വെയ്ക്കാം.
                                           നിനക്ക് വേണ്ടി മാത്രം.
                                                  പക്ഷെ,
                                              എന്റെ മൌനം
                                      നിന്നെ വേദനിപ്പിക്കുമെങ്കില്‍ 
                                     പിന്നെ ഞാന്‍ എന്തു ചെയ്യണം.?

Wednesday, 16 May 2012

നിനക്ക്

"ഒരു വാക്ക് 
ഒരു നോക്ക് 
ഒരു നീലാകാശം 
മഴ പെയ്തു തോര്‍ന്ന് 
പൂവിട്ട പ്രഭാതം
ഒരു നാലിതള്‍ പൂവ് .
ഞാന്‍ 
എന്റെ ജന്മം 
രണ്ട് കണ്ണുനീര്‍ തുള്ളി.
ഇതിലുമുപരി 
ഇനിയെന്ത് നല്‍കണം ?"

Wednesday, 11 April 2012

രാത്രിയുടെ നിലവിളി

കരിവളയുടഞ്ഞുതിര്‍ന്ന
ചുടുചോരയില്‍ കണ്ടത്
വര്‍ണങ്ങളുടെ 
വെറും ലയനങ്ങള്‍.
കിടപ്പറയുടെ വിമൂഖതകളില്‍ 
മറന്നുവച്ച നിശ്വാസങ്ങള്‍.
ഒരു വിളിപ്പാടകലെ
കൊഴിഞ്ഞു വീണ മോഹങ്ങള്‍.
അനാഥമായ നിലവിളികള്‍ക്കൊടുവില്‍
തളര്‍ന്നു വീണ ശരീരങ്ങള്‍.
അസ്തമയ സൂര്യന്‍ 
രാത്രിയെ വിളിച്ചുണര്‍ത്തി.
നിലാവ് അറിയാത്ത ഭാവം നടിച്ച്
എങ്ങോ പോയൊളിച്ചു.
ഇനിയുള്ളത് ,
മിഴികളിറുക്കിയടച്ചു 
നീണ്ടു പോകുന്ന ഇരുള്‍ വഴികളിലേക്ക് 
തിരിഞ്ഞുനോക്കാനാകാതെയുള്ള
വീഴ്ചകളാണ് ....

Tuesday, 27 March 2012

നിനക്കായ്‌...

ഒരു മഹാസാഗരം നിന്‍
ഹൃദയ വീഥിയില്‍ ഒഴുകീടുകില്‍
അതിലോരുകണമേറ്റെന്‍
ഹൃദയവേദന നീങ്ങിടുകില്‍
ഇനിയെനിക്കാവതില്ല
നിന്‍ ഇളംതെന്നലേറ്റതിന്‍
തലോടലിലോഴുകി നിന്‍-
ജീവിതയാത്രയിലൊരു
നീര്‍മുത്തായ്‌ അലിയാതിരിക്കുവാന്‍.
ഇനിയീ വേദനകളില്‍
താങ്ങായ്‌,തണലായ്‌
തരിയകലമിടാതൊരു-
തിരിനാളമായ് നിന്‍-
വഴികളില്‍ വെളിച്ചം
വിതറിടുവാനിനിയെന്നും,
നിനക്കായ്‌.....
നിനക്കായ്‌ മാത്രം......   

Monday, 12 March 2012

വിലാസം


മുറിയില്‍ നിറയെ ക്ഷണക്കത്തുകള്‍ 
കുറിപ്പടികള്‍ പലതുമുണ്ട്.
എല്ലാറ്റിനും ഒരൊറ്റ ഉദ്ദേശ്യം.
ക്ഷണിക്കുക..
പക്ഷെ,എല്ലാം വിവിധ തിയ്യതികള്‍.
അപൂര്‍വം ചിലത് ഒരേ തിയ്യതി.
അതിലൊരെണ്ണം എടുത്തു.
അത്,ഒരു വിവാഹ ക്ഷണക്കത്ത്,
അതിനടിയില്‍ ഇങ്ങനെ എഴുതിയിരിക്കുന്നു
"വധു വരന്മാരെ അനുഗ്രഹിക്കാന്‍ 
സാദരം ക്ഷണിച്ചു കൊള്ളുന്നു".
വിലാസം തിരഞ്ഞു.
പക്ഷെ,അതില്‍ വിലാസമില്ല .
വിലാസം ഇല്ലാത്ത ഒരാളെയെ -
ങ്ങനുഗ്രഹിക്കുമെന്നലോചിക്കവേ,
ഞാന്‍ ചിന്തിച്ചു,
ആര്‍ക്കാണുള്ളത് സ്വന്തമായ് വിലാസം..

Sunday, 26 February 2012

നിന്റെ മണല്‍പരപ്പിന്റെ
പൊള്ളിക്കുന്ന ചൂടില്‍
പെയ്യാന്‍ കൊതിച്ചിട്ടും
ഒന്നെത്തി നോക്കാതെ പോയ മഴ
ഇന്ന്
എന്റെ കണ്ണിലേക്ക്‌ പടര്‍ന്നപ്പോഴാണ്
അടങ്ങാതെ ഇരമ്പിമറയുന്ന
കടലിന്റെ ആഴം ഞാനറിഞ്ഞത്..

Friday, 10 February 2012

പ്രണയം


നിന്റെ മിഴികളിലെ 
തീ ജ്വാലയില്‍ നിന്നും 
കത്തി പടര്‍ന്നതാണ് എന്‍ പ്രണയം.
നിന്റെ നെഞ്ചിലെ ചൂടേറ്റ്
ഉരുകിയൊലിച്ചു പോയ-
താണെന്റെ നോവുകള്‍.
നിന്റെ നിസ്വനങ്ങള്‍ക്കുള്ളില്‍ 
എന്റെ മൌനവും 
നിന്റെ ഹൃദയത്തിനുള്ളില്‍ 
എന്റെ ഹൃദയവും 
ചേര്‍ന്നിരിക്കുമ്പോള്‍
എനിക്കെങ്ങനെ നിന്നെ മറക്കാനാകും ?

Saturday, 14 January 2012

"വാര്‍ത്തകള്‍ വായിക്കുന്നത് "

ഉദരം വിറ്റ ശേഷിപ്പുകള്‍.
അമര്‍ത്തിവയ്ക്കേണ്ടിയിരുന്ന
ഒരു ഉമ്മ
തൂക്കിവില്‍ക്കപെട്ട
കുഞ്ഞിളം മേനിക്കൊപ്പം
ഉപേക്ഷിക്കപെട്ടപ്പോള്‍
ക്യാമറകണ്ണില്‍ ഒപ്പിയെടുക്കാനായിരുന്നു
അവര്‍ക്ക് തിടുക്കം.
മിനിസ്ക്രീനില്‍
ജീവിതത്തിന്റെ ബിഗ്‌സ്സിനുകള്‍
റിപ്പോര്‍ട്ട്‌ ചെയ്യപ്പെട്ടുകൊണ്ടിരുന്നു.
പ്രതികരിക്കാനറിഞ്ഞിട്ടും
മിണ്ടാതെ ഉരിയാടാതെ
"സൂം" ചെയ്തും
"ക്ലാരിറ്റി" കൂട്ടിയും
റെക്കോര്‍ഡ്‌ ചെയ്യുന്ന തിരക്കിലാണ്.
ഇടവേളകളില്ലാതെ.
"ബ്രേയ്കിംഗ് " ന്യൂസ്‌കള്‍ക്കിടയില്‍
കയ്‌മറിയപ്പെട്ട
ഒരു ചോരക്കുഞ്ഞിന്റെ കരച്ചില്‍.
"ഇനി ഒരിടവേള.
ക്യാമറ തിരിയട്ടെ,
തിരിച്ചു വരുമ്പോള്‍
നമുക്ക് പോകാം
അവിടെ,
രണ്ട്‌ വേഗതകള്‍ക്കിടയില്‍
നിലച്ചുപോയ
നിലവിളികളിലേക്ക്‌ .
അതിനും മുന്‍പേ
പോകേണ്ടതുണ്ട് തെരുവിലേക്ക്.
കല്ലേറ്റു പിടയുന്ന ജീവന്റെ-
ജീവനില്‍ ഇനിയെത്ര മിടിപ്പുകളെന്നു
റിപ്പോര്‍ട്ട്‌ ചെയ്യണം"

Tuesday, 20 December 2011

പ്രതിഷേധം

നിന്റെ ഉടല്‍
പൂ മെത്ത ആണെന്നവന്‍.
അനാഥത്വത്തിന്റെ
ബാഹ്യമുഖമെന്ന് ചിലര്‍.
വിശപ്പിന്റെ
വികൃതമുഖമെന്ന് മറ്റു ചിലര്‍.
ഇത്,
നാവരിയപ്പെട്ടവളുടെ
കണ്ണ് ചൂഴ്ന്നെടുതവര്‍ക്കുള്ള
ചെവിയടച്ചുള്ള
പ്രതിഷേധമെന്നവള്‍.
ഇനിയുള്ളത്
വിധി പറയലാണ് ...

Thursday, 15 December 2011

നിലവിളി

സയനൈഡ് പുരട്ടിയ ചുംബനങ്ങളില്‍
ഉണരാത്ത ഉറക്കത്തിലെക്കാണ്ട് പോകുമ്പോള്‍
വെന്ത വെന്നീറിന്റെ ചൂടില്‍
വേര്‍പിരിഞ്ഞകന്ന ആത്മാക്കള്‍
നിദ്രയുടെ വാതയനങ്ങല്‍ക്കപുറത്ത്
രാക്കിളികളുടെ സംഗീതത്തിനു മേല്‍
ഇരുള്‍ തീര്‍ത്തു.
നിര്‍ത്താതെയുള്ള നീണ്ട
ചൂളം വിളികള്‍ക്കിടയില്‍
അറിയാതെ പോയ നിലവിളികള്‍.
അകലെ
പോസ്റ്റ്‌മോര്‍ട മേശയില്‍
പുഴുവരിച്ച രാത്രിയില്‍
ചിറകറ്റു വീണ കിനാശലഭങ്ങള്‍
മരവിച്ചുറങ്ങുകയാണ്‌.
കൊത്തിവലിക്കാന്‍
കയ്യില്ലാതവനെ തേടി
തിരികെ വരുമെന്ന് പറഞ്ഞ്‌
ബലികാക്കകള്‍ വറ്റു കൊത്താതെ പോയി.
പിടഞ്ഞ്ഒഴുകിയ രക്തത്തിന്റെ
നിലവിളികള്‍.
ഒരു വിരല്‍ ദൂരത്തില്‍
പിച്ചിചീന്തിയ ശരീരസമസ്യകള്‍.
ചിതയെരിഞ്ഞ മണ്ണില്‍
അപായചങ്ങലയില്ലാതോടുന്ന യാഥാര്‍ത്ഥ്യം.
ഓര്‍മകളുടെ മുറ്റത്ത്‌
ചില്ല്കൊട്ടാരത്തിനുള്ളില്‍
അവളുറങ്ങുമ്പോള്‍
അവിടെ ,നിലാവ്
രക്തം കട്ട പിടിച്ച രാത്രിയില്‍
നീണ്ടു പോകുന്ന റയില്‍പാളങ്ങളില്‍
ഒറ്റകയ്യനെ തിരഞ്ഞുകൊണ്ടിരുന്നു ....
 

Thursday, 8 December 2011

പുതപ്പ്‌

എപ്പോഴും ഉണ്ടായിരുന്നു നീ.
യാത്ര കഴിഞ്ഞ്
ക്ഷീണിച്ചെത്തുമ്പോള്‍.
തണുപ്പിന്റെ 
തൂമഞ്ഞു കുളിര്‍ വന്നു പുല്‍കുമ്പോള്‍.
പനിചൂടെടുത്ത്
ചുരുണ്ട് കൂടുമ്പോള്‍.
സ്വപ്നങ്ങളുടെ നിലാമഴയില്‍ 
കവിതയായ് വന്ന്‌
ആരോ ചുംബിക്കുമ്പോള്‍.
വാക്കുകളുടെ അസ്ത്രമുനകളില്‍ പെട്ട് 
നെഞ്ചിന്‍കൂട് പിളരുമ്പോള്‍.
എപ്പൊഴുമുണ്ടായിരുന്നു നീ.
വിയര്‍പ്പിന്റെ ഗന്ധമറിഞ്ഞു
കലങ്ങിയ കണ്ണിന്റെ നനവറിഞ്ഞു 
കണ്മഷിക്കറയറിഞ്
ഉള്‍ചൂടറിഞ്ഞ്
ഉള്‍തുടിപ്പിന്റെ
നേര്‍ത്ത നിശ്വാസമേറ്ററിഞ്ഞ്
എന്നിലലിഞ്ഞു ചേര്‍ന്ന്........